Ég vil byrja á því að óska öllum gleðilegra páska!!  og afsaka það hvað ég hef verið léleg að blogga, en tölvan mín dó daginn eftir að síðasta færslan var skrifuð...  Hún lenti í slysi í ágúst, en þá helltist yfir hana hvítvín.  Hún lifði samt óvenjulengi eftir það, en dó eftir að Danni slökkti á henni og hún hefur ekki viljað ræsa sig aftur síðan þá... 

Á þessum vikum sem hafa liðið síðan ég bloggaði síðast hefur margt gerst... 
Við Danni erum flutt í nýju íbúðina hans og erum að klára að setja upp veggi til að stúka af herbergi fyrir Selmu Rán, þetta er ótrúlega kósý íbúð, og verður enn meira kósý eftir að við erum búin að klára herbergið og þífa þetta helv. sparslryk sem er yfir allri íbúðinni...
Ég er hætt í skóla og er farin að vinna á leikskóla, er á leikskólanum hennar Selmu Rána.   Ég var að vinna þar með skólanum í haust og komst aftur á deildina mína...  Það var æðislegt að hitta börnin "mín" aftur...   Selma fer á annan leikskóla í haust, en það er leikskóli í hverfinu okkar og ég ætla að sækja um vinnu á öðrum leikskóla í sama hverfi.  Það er nefnilega ekki vel séð að foreldrar séu að vinna á leikskóla barnsins síns, en samt var það leikskólastjórinn á leikskólanum hennar Selmu sem hringdi í mig og bauð mér vinnu...
Við erum búin að fá okkur kött...  Hann heitir Jack og verður að sjálfsögðu merktur Jack Daníels...    Hann er óttarlega vitlaus greyjið, ræðst á tærnar á manni eins og hann fái borgað fyrir það...  Virðist ekki læra að borð eru bannsvæði, og svo fyrstu vikurnar þá réðist hann á mann og beit og klóraði (það var hans hugmynd að leik)...  En eftir að Anna og Böddi komu með kisuna sína, en við ætluðum að passa hana meðan þau væru úti, en Jack var svo vondur við hana og hún skíthrædd að þau ákváðu að láta einhvern annan passa prinsessuna, þá hefur Jack róast mjög mikið... 

En jæja, ég verð víst að halda áfram að vinna...  Tók aukavakt í 10-11 Eggertsgötu, og það er svo lítið að gera að ég hangi bara í tölvunni...  Reyni að komast í tölvu fljótlega aftur til að blogga meira...

Sigga Lára

Elskan mín á afmæli í dag, en ég hef nánast ekkert fengið að hitta hann...  Dagurinn hans byrjaði á því að hann þurfti að fara á fund frá 9-12 og svo er hann á kvöldvakt núna, eða frá 16-24.  Þessir 4 tímar sem hann hafði á milli fundarins og vinnunnar fór í að útvega öll þau gögn sem hann þarf til að standast greiðslumat vegna íbúðakaupa.  Fór reyndar með honum á fasteignasöluna að gera tilboð í íbúðina sem okkur langar í og svo fengum við okkur að borða áður en hann varð að henda mér heim til að geta farið í vinnu.  Við bætum okkur það upp annaðkvöld, en hann er að spila á Hressó og svo verður djammað eftir það, okkur tókst báðum að hagræða vinnunni þannig að við erum í fríi á laugardaginn, ég þarf reyndar að mæta kl 18 í vinnu, en það er nógu seint til að ég verði búin að jafna mig eftir djammið...

Ég er í þvílíkum vandræðum, ég veit ekkert hvað ég á að gefa honum, er reyndar að spá í að bíða með það þar til við flytjum, því við erum í því núna að ákveða hverju eigi að henda og hvað eigi að fara í geymslu, þannig að það er ekkert sniðugt að vera að bæta einhverju við fyrr en við erum flutt og vitum hvað okkur vantar eða öllu heldur hvað við höfum pláss fyrir...  En ef þið eruð með hugmyndir að flottum gjöfum þá endilega látið mig vita...  Það er ógerningur að toppa afmælisgjöfina sem hann gaf mér, enda tek ég hálsmenið ekki af mér nema þegar ég fer í sturtu eða sund...

Það hlaut að koma að því að ég færi að gera eitthvað við síðuna hennar Selmu Ránar, ákvað að dunda mér við þetta á meðan Danni var að spila á árshátíð Ráðhúss Reykjavíkur í gærkvöldi.  Við vorum búin að ákveða að hafa kósý videokvöld eftir að hann væri búinn að spila og því fór ég ekkert á djammið, enda var föstudagskvöldið alveg nógu stór skammtur af drykkju og djammi fyrir þessa helgi. Við fórum í partý í Hafnarfjörðinn til vinnufélaga hans Danna og kíkum svo á Hressó, þar sem ég hitti m.a. Siggu og Oddnýju sem voru með mér í sálfræði í HÍ, og vorum þar til lokunar.  Föstudagskvöldið endaði reyndar ekkert alltof vel, þar sem ég fékk líka þetta þvílíka mígrenikast ásamt því að fá tak í axlir og bak.  Mig verkjaði við hvert einasta skref sem ég tók og var því ekkert alltof góð í skapinu, og greyið Danni fékk að finna aðeins fyrir því.  En ég held að þessi elska sé búinn að fyrirgefa mér það hvernig ég talaði við hann, ja þegar ég talaði við hann á annað borð, því ég var of upptekin við að reyna að útiloka sársaukann og passa mig að segja ekkert sem ég gæti séð eftir seinna. 

En þetta verður að vera nóg í bili, ég ætla að reyna að leggja mig í smá stund og fara svo að taka til áður en Selma Rán kemur heim aftur.  Fréttir af íbúðamálunum koma um leið og þau mál fara að skýrast.

Jæja, nú fer að styttast í það að við fáum íbúðarmálin á hreint, svar frá fasteignasalanum sem hafði samband við Danna um íbúðina hans kemur í dag eða á morgun.  Þá vitum við hvort við þurfum að fara að leita okkur að leiguíbúð eða ekki, því hvernig sem fer með íbúðina hans þá flytjum við af görðunum.  Reyndar þurfum við líklegast að finna okkur leiguíbúð, en spurningin er sú hvort það verði skamm- eða langtímaleiga.  Er að spá í að fara að redda mér kössum svo hægt sé að pakka niður því dóti sem við notum lítið sem ekkert, þannig að það verði ekki eins mikið stress þegar við flytjum.  Ég þarf að sortera hvað fer með okkur í næstu íbúð, hvað eigi að fara í geymslu og hverju megi henda.  Svo þarf ég líka að taka til í dótinu hennar Selmu Ránar, hún á alltof mikið dót.  Senda sumt til ömmu og afa í Keflavík og kannski eitthvað af því dóti, sem hún er vaxin uppúr, til litlu frænku hennar.

Ég er mikið búin að vera að skoða laus störf á leikskólum hér í Reykjavík og það virðist vera nóg af þeim, en ég get ekki sótt um fyrr en ég veit í hvaða hverfi við munum búa í, jafnvel er ég að spá í að sækja um í leikskólum hér nálægt svo Selma Rán þurfi ekki að skipta um leikskóla, henni líður svo vel hér þar sem hún er.  Þá get ég bara farið með hana á leikskólann á leiðinni í vinnuna og sótt hana svo þegar ég er búin, reyndar væri samt best að hún fengi pláss á leikskólanum sem ég færi að vinna á. 

En læt þetta vera nóg í bili...

Jæja, það hlaut að koma að því að stelpan léti sjá sig.  Ég er búin að hringja reglulega í Jónu til að spurja hvort hún ætli ekki að fara að koma henni út.  Hringdi í hádeginu í dag og spurði spurninguna sem ég hef spurt síðustu vikurnar "Hvenær á svo að koma krakkanum í heiminn?" og svarið sem ég fékk var "Ja, hún kom í heiminn kl. 9.47 í morgun"  Sem sagt, stór 17,5 marka stelpa fæddist í morgun á afmælisdegi langafa síns.  Móður og barni heilsast vel, en Jóna sagði samt sem áður að hún myndi aldrei gera þetta aftur, ég trúi henni svona rétt mátulega þar sem hún sagði þetta líka eftir að Kristófer fæddist.

Jóna, Ægir og Kristófer, enn og aftur til  hamingju með prinsessuna...

Jæja, þá er komið í ljós hvaða lög keppa á lokakvöldi íslensku undankeppninnar í Eurovision og mig langar til að óska Svenna til hamingju með góðan árangur laganna sinna, en hann átti 3 lög í keppninni og þau komust öll áfram á lokakvöldið, geri aðrir betur.  Uppáhaldslagið mitt er reyndar Útópía, þar sem ég hef fengið að fylgjast með ferli þess lags nánast frá upphafi.  Hann hefur af og til sent mér lög til að fá mitt álit á þeim (byrjaði á því fyrir tæpum 2 árum, þegar við fórum að tala saman aftur eftir nokkurra ára hlé) því hann segist treysta því að ég svari hreint út hvort mér finnist þau góð eða ekki, hvað mér finnist vera að þeim lögum sem ég er ekki sátt við, en segi ekki bara "já þetta er ógeðslega flott" þar sem hann er vinur minn og ég vilji ekki særa hann.  Svo er það algjörlega undir honum komið hvort hann taki eitthvað mark á því sem ég segi, en ég segi mitt álit 100% hreint út.

Svenni, ég er stolt af þér!!

En nóg um Eurovision, það er kominn tími til að halda áfram með 24 maraþonið...

Það hlaut að koma að því að ég sleppti tónleikum með strákunum á Hressó, en það var ekki viljandi gert.  Við Danni höfðum verið að kúra uppí sófa og ég ákvað að liggja lengur þegar hann fór að róta.  Ætlaði að mæta eitthvað um 11 leitið, en nei ég sofnaði fljótlega eftir að hann fór og vaknaði ekki fyrr en 10 mínútur í 1 og þá tók því ekki að fara, bara til þess eins að fá far heim með Danna. 

Svefnleysi og pirringur
Þegar Danni kom heim var ákveðið að horfa á 24, þar sem Danni var ekkert þreyttur og ég ný vöknuð.  Við horfðum á 10 þætti og uppúr 7 var farið að tala um það að fara að sofa.  Ég gat ekki sofnað, var skíthrædd um að það að ég myndi sofa yfir mig í vinnuna, en ég átti að mæta kl. 9.00.  Lá í sófanum í stofunni og mér leiddist, Danni sofnaði frekar fljótt. Svo loks þegar ég var að ná að festa svefn hringdi helvítis vekjaraklukkan.  Mér finnst ótrúlegt að ég hafi náð að þrauka daginn, sérstaklega þar sem hann var svo rólegur.

En jæja, held að það sé kominn tími á að ég fari að sofa, er að leka niður vegna þreytu, er hætt að ná að halda einhverju samhengi í því sem ég skrifa.

Af mér er bara allt gott að frétta, er reyndar orðin frekar þreytt á þessu námi sem ég er í, og er því að leita að annarri íbúð svo ég geti flutt af Stúdentagörðunum og farið að vinna.  Eins og það er nú gott að vera hér á görðunum þá þarf ég víst að vera í námi við HÍ til að halda íbúðinni. 
Það sem mig langar til að gera er að fara að vinna á leikskóla og sækja svo um fjarnám í leikskólakennaranum við KHÍ haustið 2007.  Eins og margir vita þá var ég að vinna á leikskóla með náminu á síðustu önn, var 3 tíma á dag í 8 vikur, því það var svo mikil mannekla á leikskólanum á þeim tíma.  Mér  hefur aldrei liðið jafn vel í nokkurri vinnu og mér leið þá.  Ég hlakkaði til að mæta í vinnuna og varð leið þegar leið á vikuna því ég hitti börnin mín ekkert yfir helgina.  Ef mér leið eitthvað illa tókst þessum elskum alltaf að kæta mig með einlægni sinni, börnin eru yndisleg, það er ekki hægt að segja annað.  Mér hefur aðeins einusinni áður hlakkað til að mæta í vinnuna en þá var ég stuðningsfulltrúi í 4. bekk í grunnskóla.  Hvað get ég sagt, það á víst vel við mig að vinna með börnum, sama á hvaða aldri þau eru.
Ég kíki ennþá á deildina mína þegar ég fer með Selmu Rán á leikskólann og þegar ég sæki hana þegar dagurinn er búinn, og alltaf er jafn gaman að sjá þessi kríli.

En nóg um þetta, ég þarf víst að fara að taka úr vél og pakka niður fyrir Selmu Rán því hún er að fara til ömmu og afa í Keflavík, þar sem ég þarf að vinna um helgina.

Selma Rán - prinsessan mín

Eins og spaces.msn.com bloggsvæðið var gott, þá hefur það verið til vandræða síðan í október og ég er gjörsamlega búin að fá nóg af því, þannig að ég ákvað að opna nýtt blogg hér á blog.central.